Einkenni

Einkenni

Ef þú finnur fyrir einkennum PCOS, koma þau venjulega fram seint á táningsaldri eða snemma á tvítugsaldri. Einkenni geta líka komið fram seinna.

Ekki allar konur með PCOS finna fyrir sömu einkennum og einkennin geta komið fram misalvarlega.


Það getur verið erfitt að koma auga á einkenni PCOS þar sem mörg einkennanna er hægt að rekja til annarra orsaka. Þess vegna er oft erfitt fyrir konur að átta sig á PCOS sé valdur af ýmsum einkennum þeirra.


Nákvæm orsök PCOS er enn óþekkt, en er talin vera samspil erfða og umhverfis.

Helstu einkenni

  • óreglulegar, miklar eða engar blæðingar
  • aukinn hárvöxtur í andliti eða á líkama (hirsutism á ensku)
  • húðvandamál eins og feit húð eða bólumyndun - sérstakleg á kinnum og kjálkum
  • þynning á hári og hárlos á höfði
  • óútskýrð þyngdaraukning - sérstaklega fitusöfnun á kvið
  • þreyta og orkuleysi


Einkenni PCOS geta haft bæði líkamleg og andleg áhrif.

Önnur einkenni

Sum einkenni PCOS eru sýnileg á meðan önnur einkenni eru ósýnileg.


Sýnileg einkenni


  • dökk, þykk húð aftan á hálsi, undir höndum eða brjóstum eða í nára. Þetta getur verið merki um forstig sykursýkis eða insúlínviðnám.
  • bólgur og bólguástand - PCOS getur valdið því að kviður sé útþaninn og andlit þrútið og bólgið.
  • þurrkublettir í hársverði og augabrúnum (á ensku seborrheic dermatitis).
  • roði, sérstaklega í andliti.
  • milliblæðingar.


Ósýnileg einkenni


  • skapsveiflur - PCOS getur aukið líkurnar á sveiflum í skapi.
  • kvíði og þunglyndi - hormónabreytingar og einkenni eins og hárvöxtur, hárlos og þyngdaraukning geta haft neikvæð áhrif á sjálfstraust.
  • grindarverkir - geta komið fram við blæðingar ásamt miklum blæðingum. Þeir geta líka komið fram utan blæðinga.
  • höfuðverkir - hormónabreytingar geta framkallað höfuðverki.
  • heilaþoka - truflun við hugsun, einbeitingu og minni.
  • svefntruflanir - svefnleysi, lélegur svefn eða erfiðleikar með að sofna. Það eru margir þættir sem geta haft áhrif á svefn, en PCOS hefur verið tengt við svefnröskun sem kallast kæfisvefn.
  • nartþörf og áköf löngun í mat (á ensku craving) - hormónaójafnvægi og insúlínviðnám getur haft áhrif á hvernig líkaminn upplifir hungur og seddu.
  • meltingartruflanir og ógleði - hormónabreytingar geta haft áhrif á meltinguna.
  • þurrkur í leggöngum.
  • lág kynhvöt eða kynlöngun - hormónabreytingar geta haft áhrif á kynhvöt.


Fylgikvillar

  • Insúlínviðnám

    Margar konur með PCOS eru líka með aukið insúlínviðnám. Það þýðir að líkaminn vinnur ekki úr glúkósa (blóðsykri) eins og hann ætti að gera.


    Þetta getur leitt til hækkaðs blóðsykurs og valdið því að líkaminn framleiðir meira insúlín. Of mikið insúlín getur valdið því að líkaminn framleiðir fleiri andrógen.


    Aukið insúlínviðnám veldur því að líkaminn er líklegri til að þyngjast og gerir það erfitt að léttast. 


  • Þunglyndi og kvíði

    Konur með PCOS eru líklegri til að þróa kvíða og þunglyndi. 


    Bæði hormónabreytingar og einkenni eins og aukinn hárvöxtur, þyngdaraukning eða frjósemisvandi geta haft áhrif á sjálfstraust.


    Ef þú finnur fyrir einkennum kvíða og þunglyndis er mikilvægt að þú ræðir þau við lækni þinn.

  • Frjósemisvandi

    PCOS er ein algengasta orsök frjósemisvanda kvenna. Margar konur uppgötva að þær eru með PCOS þegar þær eiga í erfiðleikum með að verða verða óléttar.


    Í hverjum tíðahring losa eggjastokkarnir egg í legið. Þetta ferli er kallað egglos og gerist venjulega einu sinni í mánuði.


    Sumar konur með PCOS fá sjaldan eða aldrei egglos, sem þýðir að þær hafa óreglulegar eða engar blæðingar og eiga erfitt með að verða óléttar.


    Þú getur fengið blæðingar án þess að fá egglos. 


    Ekki allar konur með PCOS eiga erfitt með að verða óléttar.

  • Áhætta síðar á lífsleiðinni

    Konur með PCOS eru líklegri til að þróa önnur heilsufarsvandamál síðar á lífsleiðinni. 


    Konur með PCOS eru til dæmis í aukinni hættu á:


    • sykursýki 2 - ástand sem veldur því að blóðsykursgildi verða of há
    • þunglyndi og kvíða -  hormónaójafnvægi og önnur einkenni sem geta haft áhrif á geðheilsu, sjálfstraust og sjálfsálit
    • háan blóðþrýsing og hátt kólesteról - sem getur leitt til hjarta- og æðasjúkdóma 
    • kæfisvefn - ástand sem veldur truflun á öndun í svefni

    Konur sem hafa haft óreglulegar  eða fáar blæðingar í mörg ár geta verið í aukinni hættu á að fá krabbamein í legi (legbolskrabbamein). 


    Líkurnar á að fá krabbamein í leg eru samt litlar og hægt að lágmarka þær enn frekar með því að nota aðferðir til að stjórna blæðingum.

  • Áhætta á meðgöngu

    Konur með PCOS eru í meiri hættu á fylgikvillum á meðgöngu, svo sem háþrýstingi, meðgöngueitrun, meðgöngusykursýki og fósturláti.

Share by: